اسلام آباد(ویب ڈیسک)پاکستان میں کورونا وائرس سے صحت یاب ہونے والے پہلے مریض یحییٰ جعفری نے اپنا پلازمہ کورونا کے شکار مریضوں کے علاج کیلئے عطیہ کردیا۔ یحییٰ جعفری کا کہنا ہے کہ وائرس کچھ ہی عرصے میں تاریخ بن جائے گا لیکن ہماری کوششیں یاد رکھی جائیں گی۔ کراچی کے نجی اسپتال میں ماہر امراض خون ڈاکٹر ثاقب انصاری اور اپنے والدین کے ہمراہ پریس کانفرنس کرتے ہوئے کورونا وائرس سےجنگ لڑکر صحت یاب ہونے والے مریض یحییٰ نے اپنی کہانی سنائی۔ انہوں نے کہا کہ یہ وائرس کچھ ہی عرصے میں تاریخ بن جائے گا لیکن ہماری کوشش یاد رکھی جائیں گی۔
ماہر امراض خون ڈاکٹر ثاقب انصاری نے بتایا کہ جو مشینیں ڈینگی کے علاج میں کام کرتی ہیں و ہی کورونا میں استعمال ہوتی ہیں۔ کورونا کے 90 فیصد متاثرین میں پلازمہ کی ضرورت نہیں پڑتی۔ ڈاکٹر ثاقب کہتے ہیں کہ اس طریقہ علاج کے لیے حکومت کے فیصلے کے منتظر ہیں۔ پریس کانفرنس میں قومی کرکٹر رومان رئیس بھی موجود تھے۔ انہوں نے کورونا کے خلاف جنگ لڑنے اور اپنا پلازمہ عطیہ کرنے پر یحییٰ کو مبارک بعد پیش کی اور عوام سے احتیاط کرنے اور حکومتی اقدامات پر عمل کرنے کی درخواست بھی کی۔ یحییٰ جعفری کا پلازمہ کورونا وائرس کے مریضوں کا علاج پیسیو امیونائزیشن کے طریقے سے کرنے میں کام آئے گا۔ ملک میں پیسیو امیونائزیشن کا طریقہ علاج ممتاز ہیموٹولوجسٹ ڈاکٹر طاہر شمسی کی تجویز پر اختیار کیا جارہا ہے جس کی اجازت حکومت سندھ دے چکی ہے۔