سوات کے نوجوان افتاب عالم کا بڑا کارنامہ: انٹر بورڈ آل پاکستان باڈی بلڈنگ مقابلوں میں تیسری پوزیشن حاصل

سوات: سوات کے نوجوان کھلاڑی افتاب عالم نے انٹر بورڈ آل پاکستان باڈی بلڈنگ کے مقابلوں میں شاندار کارکردگی کا مظاہرہ کرتے ہوئے قومی سطح پر تیسری پوزیشن حاصل کر لی۔ افتاب عالم، جو شیر عالم کے صاحبزادے ہیں، نے اپنی محنت، لگن اور صلاحیتوں کی بدولت سوات کا نام روشن کر دیا ہے۔

ملک بھر سے نوجوان کھلاڑیوں نے ان مقابلوں میں حصہ لیا، لیکن افتاب عالم نے اپنی مضبوط کارکردگی کے ذریعے نمایاں کامیابی حاصل کی۔ ان کی اس کامیابی نے سوات کے عوام میں خوشی کی لہر دوڑا دی اور ان کے خاندان کے لیے بھی یہ ایک اعزاز کا لمحہ ہے۔

عوامی حلقوں اور مقامی رہنماؤں نے افتاب عالم کی اس شاندار کامیابی کو سراہتے ہوئے انہیں خراج تحسین پیش کیا۔ ان کا کہنا ہے کہ افتاب عالم نے ثابت کر دیا ہے کہ سوات کے نوجوان قومی اور بین الاقوامی سطح پر بڑی کامیابیاں حاصل کرنے کی صلاحیت رکھتے ہیں۔

افتاب عالم کی کامیابی نے سوات کے دیگر نوجوانوں کے لیے ایک نئی امید اور حوصلے کا پیغام دیا ہے، جو ان کے لیے مشعل راہ ثابت ہو سکتی ہے۔ افتاب عالم نے اس عزم کا اظہار کیا ہے کہ وہ مستقبل میں مزید محنت کے ساتھ قومی اور بین الاقوامی سطح پر کامیابیاں حاصل کر کے اپنے علاقے اور ملک کا نام مزید روشن کریں گے۔