ملک کے تمام سیاست دان جی ایچ کیو اور مارشل لا کی پیداوار ہیں، شیخ رشید

لاہور (ویب ڈیسک ) لاہور میں پریس کانفرنس کے دوران شیخ رشید نے کہا کہ ملک کے تمام سیاستدان جی ایچ کیو کے گیٹ نمبر 4 سے نکلے ہیں، ذوالفقار علی بھٹو سے نواز شریف تک تمام سیاستدان مارشل لا کی پیداوار ہیں۔ تاریخ پڑھی جائے کہ ذوالفقار علی بھٹو کو بھٹو کس نے بنایا، ان کی اہلیہ نصرت بھٹو نے کیا کچھ کیا۔ عمران خان کے آنے تک پاک فوج کافی بدل گئی ہے کیونکہ اب گیٹ نمبر 4 نہیں رہا۔

وزیر ریلوے کا کہنا تھا کہ پرویز مشرف کو غدار نہیں سمجھتا وہ محب وطن ہیں، سنگین غداری کیس کے تفصیلی فیصلے کا پیرا 66 غیر آئینی،غیر سنجیدہ اور غیر قانونی فیصلہ ہے، یہ مارشل لاء کے مترادف ہے، عدلیہ پاکستان اور فوج کا اہم ستون ہے یہ نہیں ٹکرائیں گے، نئے چیف جسٹس پاکستان جسٹس گلزار احمد کی آمد سے ملک آگے بڑھے گا۔
شیخ رشید نے کہا کہ کرپشن غداری کے مترادف ہے، بدقسمتی سے اس ملک میں جو آیا اس نے مال بنایا، خورشید شاہ کے126 اکاوَنٹس نکلے اور انہیں ضمانت مل گئی، پیپلزپارٹی سارے کیسز سندھ منتقل کرانا چاہتی ہے، آصف زرداری کی کرپشن میں بلاول بھی شامل ہیں، ڈیڑھ ارب روپے کی ٹرانزیکشن میں بلاول بھٹو زرداری کے دستخط موجود ہیں بلاول بھٹو زرداری نے پلی بارگینگ نہ کی تو وہ بھی مریم نواز شریف کی طرح ملکی سیاست سے مائنس ہوجائیں گے۔ پنجاب میں پیپلزپارٹی کی کوئی جگہ نہیں ہے۔

وفاقی وزیر نے کہا کہ شہبازشریف وکٹ کے دونوں طرف کھیلنے والے کھلاڑی ہیں، شہباز شریف پرویز مشرف کے خلاف نہیں بولے اور وہ ہی نواز شریف کو لندن لے کر گئے، شہبازشریف کی اچھی خبر آنے والی ہے وہ انجوائے کررہے ہیں، شریف برادران لندن میں نئے سال کا آغاز کریں گے، شہباز شریف نیا ہیٹ اور کورٹ پہنیں گے، عمران خان کو دکھ ہے اور رہے گا کہ نوازشریف باہر چلے گئے۔