نربھیا زیادتی کیس کے چاروں مجرمان کو 20 مارچ کو پھانسی دی جائے گی

دہلی(ویب ڈیسک) بھارتی دارالحکومت نئی دہلی میں چلتی بس میں 23 سالہ طالبہ نربھیا کو زیادتی کا نشانہ بنانے والے چاروں مجرمان کو 20 مارچ کو پھانسی دی جائے گی۔ دہلی ہائی کورٹ نے چاروں مجرمان کی سزائے موت کے نئے وارنٹس جاری کردیے جس کے مطابق انہیں 20 مارچ کو صبح پانچ بجکر 30 منٹ پر پھانسی دی جائے گی۔ گزشتہ روز بھارتی صدر نے آخری مجرم کی رحم کی درخواست کو بھی مسترد کردیا تھا جس کے بعد دہلی ہائی کورٹ نے چاروں مجرمان کی سزائے موت کے نئے وارنٹس جاری کردیے ہیں۔ عدالت نے چوتھی مرتبہ مجرمان کی پھانسی کے وارنٹ جاری کیے ہیں۔ خیال رہے کہ 2012 میں نربھیا نامی لڑکی کو اجتماعی زیادتی اور تشدد کا نشانہ بنایا گیا تھا، تشدد کی وجہ سے اسپتال میں زیر علاج لڑکی کچھ دنوں بعد دم توڑ گئی تھی۔