بھارت میں سنجیدہ حکومت ہوتی تو مسئلہ کشمیر حل ہو جاتا: وزیراعظم

اسلام آباد(ویب ڈیسک)وزیراعظم عمران خان نے کہا ہے کہ پاکستان اور بھارت کے درمیان مسئلہ کشمیر تجارت اور خوشحالی کی راہ میں رکاوٹ ہے۔ بیلجیئن ٹی وی چینل کو انٹرویو میں وزیراعظم عمران خان نے کہا کہ پاکستان اور بھارت کے درمیان مسئلہ کشمیر تجارت اور خوشحالی کی راہ میں سب سے بڑی رکاوٹ ہے لیکن اگر بھارت میں سنجیدہ حکومت ہوتی تو مسئلہ کشمیر حل ہو جاتا۔

انہوں نے کہا کہ بھارتی فوج نے کشمیری نوجوانوں کو جیل میں ڈالا ہوا ہے کیونکہ بھارتی حکومت آر ایس ایس اور ہندوتوا کے نظریے سے متاثر ہے۔ افغانستان کے حوالے سے بات کرتے ہوئے عمران خان نے کہا کہ افغانستان میں امن کے لیے ہر ممکن مدد کر رہے ہیں، امریکا اور طالبان کے درمیان مذاکرات کی کامیابی سے امن کا قیام ممکن ہو سکے گا۔ کرکٹ سے سیاست میں آنے سے متعلق سوال پر وزیراعظم نے کہا کہ کرکٹ کھیلنے اور ملک چلانے میں فرق ہوتا ہے، ناکامی سے خوفزدہ نہیں ہوں، اپنی بھرپور کوشش کر رہا ہوں، کامیابی دینا نہ دینا الله کے ہاتھ میں ہے۔