سوات، اوڈیگرام: گزشتہ روز اغوا ہونے والا بچہ بازیاب کر لیا گیا، جبکہ پولیس نے واقعے میں ملوث خاتون کو گرفتار کرلیا۔ اطلاعات کے مطابق، گرفتار خاتون کا تعلق صوابی سے ہے، جو حالیہ دنوں میں تختہ بند میں مقیم تھی۔
بچے کی بازیابی میں مقامی پیٹرول پمپ کے منیجر نے اہم کردار ادا کیا، جس کی بروقت اطلاع پر پولیس نے کارروائی کرتے ہوئے خاتون کو حراست میں لے لیا۔ پولیس حکام کے مطابق، بچے کی تلاش کے لیے جدید تکنیکی ذرائع استعمال کیے گئے اور مختلف مقامات پر چیکنگ کا عمل جاری رکھا گیا، جس کے نتیجے میں خاتون کی گرفتاری ممکن ہوئی۔
عوامی حلقوں نے پیٹرول پمپ منیجر کی فوری کارروائی اور پولیس کی پیشہ ورانہ مہارت کو سراہتے ہوئے کہا کہ شہریوں اور قانون نافذ کرنے والے اداروں کے باہمی تعاون سے ہی ایک محفوظ اور بہتر معاشرہ تشکیل دیا جا سکتا ہے۔ پولیس نے مزید تحقیقات کا آغاز کر دیا ہے تاکہ اغوا کے مقاصد اور دیگر ممکنہ شراکت داروں کا پتہ لگایا جا سکے۔
