خیبرپختونخوا پولیس کو جدید ہتھیاروں سے لیس کرنے کا فیصلہ، 5.5 ارب روپے جاری
پشاور (زما سوات) خیبرپختونخوا حکومت نے پولیس کو جدید ہتھیاروں اور آلات سے لیس کرنے کا فیصلہ کرتے ہوئے ساڑھے پانچ ارب روپے کے فنڈز جاری کر دیے۔ اس اقدام کا مقصد پولیس کو دہشت گردی کے خلاف مزید مؤثر بنانا اور سیکیورٹی اقدامات کو مزید بہتر بنانا ہے۔
تفصیلات کے مطابق، پولیس کی گاڑیوں کو بلٹ پروف بنانے اور جدید آلات کی خریداری کے لیے 3 ارب روپے جاری کیے گئے ہیں، جبکہ تمام اضلاع میں اسپیشل ویپن اینڈ ٹیکنیکل ٹیمیں بنانے کا بھی فیصلہ کیا گیا ہے۔ اسی طرح، تھانوں اور چیک پوسٹوں کو مزید محفوظ بنانے کے لیے 1.3 ارب روپے مختص کیے گئے ہیں۔
علاوہ ازیں، سالانہ ترقیاتی پروگرام میں شامل تھانوں اور چیک پوسٹوں کی تعمیر کے باقی ماندہ منصوبوں کے لیے 50 کروڑ روپے فراہم کیے جائیں گے۔ پولیس کو جدید آلات فراہم کرنے کے منصوبے کے تحت نائٹ ویژن گوگلز، اسنائپرز اور دیگر جدید ہتھیاروں کی خریداری کے لیے 72 کروڑ روپے مختص کیے گئے ہیں۔
مزید برآں، خیبرپختونخوا حکومت نے پولیس افسران کی تنخواہیں بلوچستان پولیس کے افسران کے برابر کرنے کا اصولی فیصلہ کر لیا ہے، جبکہ پولیس اہلکاروں کی تنخواہیں پنجاب پولیس کے برابر کرنے کا بھی اعلان کیا گیا ہے۔
صوبائی حکومت کے مطابق، یہ اقدامات پولیس فورس کو مزید مضبوط اور جدید خطوط پر استوار کرنے کے لیے کیے جا رہے ہیں، تاکہ صوبے میں امن و امان کو یقینی بنایا جا سکے۔
